ՀԱՅՈՑ ԻՇԽԱՆԱՑ ՄԻՈՒԹՅՈՒՆ

Հայոց Նիշագիտական Խորհուրդը հանդիսանում է գերագույն նիշագիտական և կարգավորիչ-խորհրդատվական ատյան հայոց միապետական-ազնվական համակարգում և գործում է համատեղորեն Հայոց Իշխանաց Միությանը եւ Մէլիքաց Միությանը կից: 

Հայոց Նիշագիտական Խորհրդի հիմնական նպատակներն են՝ ապահովել միասնական ու համակարգված քաղաքականություն, կանոններ, չափորոշիչներ, և արարողություններ հայոց միապետական-ազնվական (արքայական, թագավորական, իշխանական, տիտղոսավոր և ոչ-տիտղոսավոր ազնվական) տոհմիկ տոհմանիշերի և անձնական զինանշանների, ինչպես նաև կնիքների և դրոշների բնագավառում: 
 

Նիշագիտությունը հատուկ մասնագիտացված գիտություն է, որն ուսումնասիրում և կարգավորում է նշանակների (տոհմանիշերի և զինանշանների) հետ կապված հարցերը: Այն ունի իր հատուկ մշակված կանոնները, լեզուն, ավանդույթները, գործառույթներն ու արարողությւնները: Դրոշագիտությունն ու կնքագիտությունը նիշագիտության ածանցյալ և օժանդակ գիտություններ են: 

​

Հայոց նիշագիտական համակարգում նշանակ (տոհմանիշ կամ զինանշան) է համարվում հայոց նիշագիտական կանոններով կազմված և համապատասխան վահանի վրա զետեղված նշանի կամ նշանների որոշակի պատկերը, որն ընդունված և գրանցված է Հայոց Նիշագիտական Խորհրդի կողմից Նիշամատյանում: 

​

Ցանկացած անձ՝ անկախ տոհմական ծագումից, նշանակի (զինանշանի) իրավունք ունի , պայմանով, որ այդ նշանակը մշակված և ստեղծված է Հայոց Նիշագիտական Կանոնների համաձայն: Հիշյալ կանոնների խախտումով ստեղծված նշանակները ապօրինի են: